ᖃᓄᐃᓕᐅᕐᓂᐅᕙᒃᑐᑦ

ᐊᐅᓱᐃᑦᑐᒥ ᐱᓕᕆᔭᒃᓴᖅᑕᖃᑦᑎᐊᖃᑦᑕᕐᐳᖅ. ᐊᐅᔭᐅᑎᓪᓗᒍ, ᓄᓇᓕᖓᓂ ᐱᓱᕋᔭᒍᓐᓇᕐᐳᑎᑦ. ᑕᒪᓐᓇᑦᑕᐅᖅ ᐊᑲᐅᓈᑦᑎᐊᕋᔭᕐᐳᖅ ᑕᕆᐅᕐᒥ ᖃᔭᖅᑐᕐᓗᑎᑦ.

ᑕᐃᒃᑯᐊ ᓵᑕᖅᓯᕙᒃᑐᑦ ᖃᐅᓱᐃᑦᑐᒥᑦ ᖁᑦᑎᓐᓂᖅᐹᖅ ᒥᕐᖑᐃᖅᓯᕐᕕᖓᓄᑦ ᐊᐅᓱᐃᑦᑑᑉ ᐅᐊᖕᓇᖓᑕ ᕿᑭᖅᑖᓗᖓᓂ, ᐊᐅᓱᐃᑦᑐᖅ ᐊᖅᑯᑖᒍᑦ ᑕᒻᒫᕐᕕᑦᑎᐊᕙᐅᕙᒃᐳᖅ.

ᓄᓇᓕᖓᓂ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᐋᖅᑭᒃᓱᐃᔪᓐᓇᕐᐳᑦ ᐃᑲᔪᖅᑎᖃᕈᓐᓇᕐᓗᑎᑦ ᐊᐅᓪᓛᕐᓂᐊᖅᑎᓪᓗᑎᑦ ᑕᑯᔭᖅᑐᕐᓗᒋᓪᓘᓐᓃᑦ ᐃᑦᑕᕐᓂᓴᖃᕐᕖᑦ ᐅᕝᕙᓗ ᐆᒪᔪᓂᒃ ᕿᒥᕐᕈᓇᒋᐊᕐᓗᑎᑦ, ᕿᒧᒃᓯᖃᑕᐅᔪᓐᓇᕆᕗᑎᑦ ᐅᕝᕙᓗ ᐃᒡᓗᕕᒐᓕᐊᕆᔭᔅᓯᓐᓂ ᓯᓂᒃᑕᕐᓗᑎᑦ.

ᐊᐅᓱᐃᑦᑐᖅ ᐃᖃᓗᒐᓱᕝᕕᑦᑎᐊᕙᐅᓂᖅᐹᖑᖃᑕᐅᕗᖅ ᓄᓇᕐᔪᐊᓕᒫᒥ. ᒪᒪᑕᒍᓐᓇᕐᐳᑎᑦ ᐃᖃᓗᖕᒥᒃ ᑕᓪᓗᕈᑎᐅᑉ ᐊᒻᒪ ᐊᐅᓱᐃᑦᑑᑉ ᕿᑭᖅᑖᓗᖓᑕ ᓂᒋᐊᑕ ᐊᑯᓐᓂᖓᓃᑦᑐᖅ (Jones Sound) ᐃᒐᓗᑎᑦ. ᐃᑲᔪᕈᒪᑦᑎᐊᕐᐳᒍᑦ ᐊᐅᓪᓛᕐᑎᑦᑎᔨᐅᒋᐊᒥᒃ ᖁᑦᑎᓐᓂᖅᐹᖅ ᐃᖃᓗᒐᓱᕝᕕᑦᑎᐊᕙᐅᓂᖅᐹᒧᑦ.

ᐃᑦᑕᕐᓂᓴᖃᕐᕕᒻᒧᐊᒍᓐᓇᕆᕗᑎᑦ ᒪᕐᕉᒃ ᑭᓛᒥᑕᓄᑦ ᒥᑦᑕᕐᕕᒻᒥᑦ ᐅᖓᓯᖕᓂᖃᕐᑐᐃᓐᓇᕐᑐᖅ. 30-ᒥᓂᑦᔅᓄᑦ ᐃᖏᕐᕋᓇᕐᑐᖅ ᑲᖏᖅᖢᒃ ᐊᖅᑯᓵᕐᓗᒍ ᑐᓂᕐᓂᑦ ᒥᑭᒋᐊᓂᐊᕐᕕᕕᓂᖅ ᓇᓄᕐᓄᑦ. ᐊᓯᖓᑦᑕᐅᖅ ᐳᓛᕆᐊᕈᓐᓇᕐᒥᔭᐃᑦ ᐱᖓᓱᑦ ᐃᓄᐃᑦ ᑕᒻᒫᕐᕕᕕᓂᖏᑦ 1953-ᖑᓕᖅᑎᓪᓗᒍ ᓅᑕᐅᓯᒪᓂᑯᐃᑦ ᓕᓐᔅᑐᕋᒻ ᑲᖏᖅᖢᖓᓄᑦ.

ᓄᓇᓕᐅᑉ ᐱᖓᓐᓇᖓᓂ, ᑐᖁᕋᕐᕕᕕᓂᕐᒥ, ᓴᓐᓂᖓᔪᓕᖕᓂᒃ ᑕᑯᒐᔭᕐᐳᑎᑦ, ᓇᒃᐸᖅᑕᐅᓯᒪᔪᖅ ᐅᒥᐊᖅᑐᕐᑎ ᐃᖅᑲᐅᒪᔭᐅᓪᓗᓂ, ᓯᕗᑦᕋᑉ ᐃᖏᕐᕋᔭᖃᑎᒋᖃᑦᑕᕐᑕᕕᓂᖓ, ᑕᒫᓂ ᐃᓅᔪᓐᓃᕐᓂᑯ. ᐊᐅᓱᐃᑦᑑᑉ ᐱᖓᓐᓇᖓᓄᑦ (Goose Fiord) ᐅᑎᕐᔭᕆᐊᕈᓐᓇᕆᕗᑎᑦ, ᓯᕗᑦᕋᑉ ᐅᑭᐅᖅᓰᕝᕕᔭᕆᐊᖃᖅᓯᒪᔭᖓ ᑲᖏᖅᖢᐊᕐᔪᖓᓂ ᐊᐅᔭᐅᑎᓪᓗᒍ ᓯᑯᐃᓐᖏᓴᐃᓐᓇᕐᓂᑯᒥ. ᕗᕌᒻ ᑲᖏᖅᖢᖓᑕ ᖃᓂᒋᔭᖓᓂ, ᓯᕗᑦᕋᑉ, ᐅᒥᐊᕐᔪᐊᖓᓂ, ᕗᕌᒻᑯᑦ, ᐃᑯᓪᓚᖅᓰᕝᕕᒋᓯᒪᔭᖓᑦ.

ᓂᕐᔪᑎᖃᕐᕕᒃ, ᐅᕝᕙᓗ ᑯᐴᒡ ᕿᑭᖅᑕᖓᓂ ᒥᕐᖑᐃᖅᓯᕐᕕᒃ, 100 ᑭᓛᒥᑕᓄᑦ ᐊᐅᓱᐃᑦᑐᒥᓐᖔᕐᓇᕐᑐᖅ. ᕿᑭᖅᑕᖅ 1995-ᒥ ᑎᑎᕋᖅᑕᐅᓂᑰᕗᖅ, ᐊᒻᒪᓗ ᖃᐅᔨᒪᔭᐅᑦᑎᐊᕐᐳᖅ ᐊᒃᐸᖃᕐᕕᐅᕙᖕᓂᖓᓂᒃ. ᐊᐅᔭᐅᓕᕌᖓᑦ, ᑕᑯᔪᓐᓇᖃᑦᑕᕐᐳᑎᑦ 30,000 ᐃᓱᓐᖓᐃᑦ ᐊᒻᒪᓗ 160,000 ᐊᒃᐸᓂᒃ ᐃᓐᓈᕈᐃᒃ ᑭᒡᓕᖓᓃᑦᑐᑦ ᕿᑭᖅᑖᐅᑉ ᑲᓇᖕᓇᖓᓂ ᓂᒋᐊᓂᓗ.

ᓇᓐᓄᒐᓱᒃᑎᑕᐅᔪᓐᓇᖃᑦᑕᕐᒥᔪᑦ ᐊᐅᓱᐃᑦᑐᒥ, ᐅᑭᐅᒃᑯᑦ ᐅᐱᕐᖓᒃᓵᒃᑯᓪᓗ, ᕿᒧᒃᓯᒃᑯᑦ ᐊᖑᓇᓱᒍᓯᑐᖃᑎᒍᑦ ᐊᖑᓇᓱᐊᖅᑎᑦᑎᕙᒻᒥᔪᑦ, ᓄᓇᓕᕗᑦ ᖁᕝᕙᓯᒃᑐᒥᒃ ᐊᖑᔭᖅᑕᐅᔪᓐᓇᕐᑐᑎᒍᑦ ᑭᒡᓕᖃᕐᕕᖃᕐᐳᖅ ᓇᓐᓄᒐᓱᒍᓐᓇᓂᕐᒧᑦ. ᑖᓐᓇ ᑭᒡᓕᖃᕐᑎᑕᐅᕕᖓ, ᑕᐃᒪᐃᒻᒪᑦ, ᐆᒧᖓ ᐊᒃᑐᐊᓂᖃᕐᐳᖅ, ᓇᓄᐃᑦ ᐅᓄᕐᓂᖏᑕ ᐱᑕᖃᕈᓐᓇᕐᓂᖓᒍᑦ. ᐊᕐᕌᒍᑕᒫᑦ, ᓇᓐᓄᒐᓱᑐᐃᓐᓇᕐᑎᐅᕙᒃᑐᓄᑦ ᑖᔅᓱᒪ ᑭᒡᓕᖃᕐᕕᐊᓂ ᓴᓂᕐᕙᐃᓯᒪᕙᒃᐳᒋᑦ.

ᓂᐅᕕᕆᐊᑲᑕᒍᒪᒍᕕᓪᓗ, ᐊᐅᓱᐃᑦᑑᑉ ᑯᐊᐸᒃᑯᖏᓐᓂ, ᓴᓇᓐᖑᐊᒐᓂᒃ ᓂᐅᕕᑲᑕᒍᓐᓇᕐᐳᑎᑦ, ᓂᐅᕕᐊᒃᓴᖃᖅᐸᒻᒥᔪᖅ ᓂᕆᔭᒃᓴᓂᒃ ᐊᒻᒪᓗ ᐊᔾᔨᒌᖏᑦᑐᑦ ᐸᓂᕐᑐᑦ ᐱᖁᑎᓂᒃ.

 

Visitez Grise Fiord:
bienvenue au sommet
du globe