ᓄᓇᓕᒃ

1922-ᖑᑎᓪᓗᒍ, ᐊᕐᕕᓂᓖᑦ ᐊᑕᐅᓯᕐᓗ ᐊᖑᑎᑦ ᐸᓖᓯᒃᑯᑦ ᐱᓕᕆᕝᕕᖓᑦ ᓴᖅᑭᑕᐅᓯᒪᕗᖅ ᑯᕋᐃᒡ ᕼᐊᐳᒥ, ᑕᓪᓗᕈᑎᐅᑉ ᐊᒻᒪ ᐊᐅᓱᐃᑦᑑᑉ ᕿᑭᖅᑖᓗᖓᑕ ᓂᒋᐊᓂ ᐊᑯᓐᓂᖓᓃᑦᑐᖅ — Jones Sound-ᒥ, ᐊᐅᓱᐃᑦᑑᑉ ᕿᑭᖅᑖᓗᖓᓂ, ᑕᒫᓂᒐᓚᒃ 55 ᑭᓛᒥᑕᓄᑦ ᐊᐅᓱᐃᑦᑑᑉ ᓂᒋᖅᐸᓯᐊᓃᑦᑐᖅ. ᐸᓖᓯᒃᑯᑦ ᐱᓕᕆᕝᕕᐊ ᒪᑐᓚᐅᕐᓯᒪᔪᖅ 1930-ᖏᓐᓂ ᐊᒻᒪ ᒪᑐᐃᒃᑲᓐᓂᕆᓪᓗᓂ 1951-ᒥ ᐅᓇᑕᕕᔾᔪᐊᕐᓂᖅ ᐱᒋᐊᓕᕐᑎᓪᓗᒍ. ᑯᐸᐃᒃ ᑕᕐᕋᖓᓂᑦ ᐊᒻᒪᓗ ᒥᑦᑎᒪᑕᓕᒻᒥᐅᑦ ᐃᓚᒌᑦ ᑯᕋᐃᒡ ᕼᐊᐳᒧᐊᖅᑕᐅᓚᐅᕐᓯᒪᔪᑦ 1953-ᒥ. ᐊᑕᐅᓯᖅ ᐱᓇᓱᐊᕈᓯᐅᑉ ᑭᖑᓂᐊᒍᑦ, 48 ᑭᓛᒥᑕᒃᑲᓐᓂᕐᓄᑦ ᓅᑕᐅᓪᓗᑎᒃ ᐱᖓᓐᓇᖓᓄᑦ ᐊᒻᒪᓗ ᓅᑕᐅᓪᓗᑎᒃ ᓕᓐᓯᑐᕋᒻ ᐱᓂᐊᓐᓱᓚᒧᐊᕐᑕᐅᓪᓗᑎᒃ.

1955 ᐅᐱᕐᖓᒃᓵᖓᓂ, ᑯᕋᐃᒡ ᕼᐊᐳᒥ ᐸᓖᓯᖃᕐᕕᒃ ᓅᑉᐸᓪᓕᐊᓕᓚᐅᕐᓯᒪᔪᖅ ᐊᐅᓱᐃᑦᑐᒧᑦ. ᐃᒡᓗᖁᑏᑦ ᐲᔭᖅᑎᕐᑕᐅᓪᓗᑎᒃ, ᐃᓚᒍᑕᖏᑦ ᓈᓴᐅᑎᓕᖅᓱᕐᑕᐅᓪᓗᑎᒃ, ᑭᑭᐊᑦ ᐊᒥᐊᒃᑯᔭᐅᓪᓗᑎᒃ, ᑭᖑᓂᐊᒍᓪᓗ ᑕᒪᕐᒥᒃ ᓅᑕᐅᓪᓗᑎᒃ ᕿᒧᒃᓯᒃᑯᑦ. ᑯᕋᐃᒡ ᕼᐊᐳᒥ ᐱᓕᕆᕝᕕᐊ ᒪᑐᐃᓐᓇᕕᓕᓚᐅᕐᓯᒪᔪᖅ ᐊᒻᒪᓗ ᐊᐅᓱᐃᑦᑐᒥ ᐱᓕᕆᕝᕕᐊ ᐃᓕᓴᕆᔭᐅᔪᑎᒍᑦ ᒪᑐᐃᖅᖢᓂ 1956-ᒥ. ᓱᓕ ᐸᓖᓯᒃᑯᑦ ᐃᒡᓗᖁᑎᖏᑦ ᐅᒥᐊᕐᔪᐊᒃᑰᕐᑎᑕᐅᓚᐅᕐᓯᒪᕗᑦ ᐊᐅᔭᐅᓕᕐᑎᓪᓗᒍ — ᐊᒡᓚᕝᕕᖃᕐᕕᐊᑦ ᒪᕐᕈᐃᓕᖓᔪᖅ ᐃᒡᓗᖁᑎ ᐊᒻᒪᓗ ᐃᒃᑮᓇᖅᑐᒃᑯᕕᐊ ᓯᕐᓗᐊᖅ. ᐃᓚᓕᐅᑎᓪᓗᒍ ᐸᓖᓯᒃᑯᑦ ᐱᓕᕆᐊᖓᓂ, ᐸᓖᓯᒃᑯᑦᑕᐅᖅ ᐊᐅᓚᑦᑎᓚᐅᕐᒥᔪᖅ ᑕᐅᖅᓰᕕᖃᕐᕕᒻᒥᒃ.

ᒐᕙᒪᑐᖃᒃᑯᑦ ᐸᕐᓇᐅᑎᓕᐅᓚᐅᕐᓯᒪᕗᑦ ᐃᓕᓐᓂᐊᕐᕕᒻᒥᒃ ᒪᑐᐃᖅᓯᓗᑎᒃ ᐊᐅᓱᐃᑦᑐᒥ ᐃᒡᓗᓕᐅᕈᑎᒃᓴᑦ ᑎᑭᐅᖅᑲᕐᐸᓪᓕᐊᓕᕐᖢᑎᒃ ᐅᒥᐊᕐᔪᐊᒃᑯᑦ 1961 ᐊᐅᔭᖓᓂ. ᓕᓐᓯᑐᕋᒻ ᐱᓂᐊᓐᓱᓚᒥ ᓄᓇᖃᕐᑐᑦ ᓅᑕᐅᓪᓗᑎᒃ ᐊᐅᓱᐃᑦᑐᒧᑦ 1962-ᒥ. ᐃᒡᓗᕋᓛᖏᑦ, ᓂᐅᕕᖅᑕᐅᓯᒪᓪᓗᑎᒃ ᒥᑭᒋᐊᕐᓂᒃᑯᑦ ᑮᓇᐅᔭᓕᐊᖏᑦᑎᒍᑦ, ᕿᒧᒃᓯᒃᑯᑦ ᓅᑕᐅᓚᐅᕐᓯᒪᕗᑦ. ᐃᓕᓐᓂᐊᕐᕕᓕᐅᓚᐅᕐᓯᒪᔪᑦ 1962 ᐊᐅᔭᖓᓂ, ᐃᓕᓴᐃᔩᑦ ᑎᑭᓚᐅᕐᓯᒪᕗᑦ ᓯᑎᐱᕆᒥ ᐊᒻᒪᓗ ᐃᓕᓐᓂᐊᕐᕕᒃ ᒪᑐᐃᖅᖢᓂ. ᓄᑖᒥᒃ ᐊᑯᓂᐅᓂᕆᔭᖓᓂᒃ ᐱᒋᐊᕐᓂᖃᓕᓚᐅᕐᓯᒪᕗᖅ!

ᐃᓕᓐᓂᐊᕐᕕᒻᒥ 32-ᓂᒃ ᐃᓕᓐᓂᐊᖅᑐᖁᑎᖃᕐᐳᖅ ᒥᑭᓛᑦ ᖁᕝᕙᓯᖕᓂᖓᓂᑦ ᑎᑭᓪᓗᒍ ᖁᕝᕙᓯᖕᓂᓕᒃ 12-ᒧᑦ. ᖃᓪᓗᓇᐅᔭᕐᓂᖅ ᐊᑐᖅᑕᐅᒐᔪᒃᐳᖅ ᑕᒪᕐᒥᐸᓗᒃ ᐃᓕᓐᓂᐊᕈᑕᐅᔪᓂ, ᑭᓯᐊᓂᑦᑕᐅᖅ ᐃᓄᒃᑎᑐᑦ ᐃᓕᓐᓂᐊᖃᑦᑕᕐᒥᔪᑦ. ᐃᓕᖅᑯᓯᑐᖃᒃᑯᑦ ᐃᓄᐃᑦ ᐊᔪᖏᓐᓂᕆᔭᖓᑦ ᐃᓕᓐᓂᐊᕐᑎᔾᔪᑕᐅᖃᑦᑕᕆᕗᖅ — ᓲᕐᓗ ᐃᒡᓗᕕᒐᓕᐅᕐᓂᕐᒥᒃ, ᕿᓚᐅᑎᓕᐅᓂᕐᒥᒃ, ᓯᓚᒥᓯᐅᑎᓂᒃ ᐊᓐᓄᕌᓕᐅᓂᕐᒧᑦ, ᐃᓚᒋᔭᐅᓪᓗᑎᒃ ᕿᓯᖕᓂᒃ ᐳᐊᓗᓕᐅᓂᕐᒧᑦ, ᐃᓚᒋᓪᓗᒍ, ᖃᑯᑎᒃᑯᑦ ᐅᓂᒃᑳᖅᑐᐊᕈᓯᑐᖃᐃᑦ ᐃᓕᓐᓂᐊᕐᑎᔾᔪᑕᐅᖃᑦᑕᕆᕗᑦ ᐃᓕᓐᓂᐊᕐᑎᓄᑦ. ᐊᕐᕌᒍᓕᒫᒥ, ᐱᓗᐊᖅᑐᒥᒃ ᐅᑭᐅᒃᑯᑦ ᑖᖏᓐᓇᖃᑦᑕᓕᕐᑎᓪᓗᒍ, ᐃᓕᓐᓂᐊᕐᕕᐅᑉ ᐱᓐᖑᐊᕐᕕᖓ ᐱᒻᒪᕆᐅᔪᑎᒍᑦ ᓄᓇᓕᖕᓄᑦ ᐱᓕᕆᕝᕕᐅᖃᑦᑕᕐᐳᖅ ᐱᑕᖃᕐᑎᑦᑎᓪᓗᓂ ᐃᒡᓗᖁᑎᐅᑉ ᐃᓗᐊᓂ ᐱᓐᖑᐊᖃᑦᑕᕐᐳᑦ ᒪᒃᑯᒃᑐᓛᑦ, ᐃᓄᑐᖃᐃᑦ ᐊᒻᒪ ᒪᒃᑯᒃᑐᑦ.

ᐊᑭᑭᑦᑐᒥᒃ ᐃᒡᓗᒧᑦ-ᐊᑐᖅᑐᐊᕐᓂᖅ ᐱᒋᐊᖅᑎᑕᐅᓯᒪᕗᖅ 1966-ᒥ. ᐃᒡᓗᐃᑦ ᐅᖅᑰᓴᐅᑎᖃᓕᕐᓗᑎᒃ ᐅᖅᓱᒨᕐᑐᑦ ᐃᒐᓂᒃ. ᐅᖅᑰᓴᐅᑎᑦ ᐊᑐᓕᖅᑎᑕᐅᓕᑕᐃᓐᓇᕐᓯᒪᕗᑦ 1982-ᒥ. ᐃᒥᖓᑦ ᐃᒪᖃᐅᑎᒃᑯᕕᕐᔪᐊᓃᖃᑦᑕᕐᐳᑦ. ᐊᖏᕐᕋᕆᔭᐅᔪᑦ ᐱᔨᑦᑎᕋᖅᑕᐅᖃᑦᑕᕐᐳᑦ ᕼᐊᒻᓚᒃᑯᓐᓂ-ᐊᖏᕈᑎᓕᐅᕐᓂᒃᑯᑦ ᐱᔨᑦᑎᕋᖅᑕᐅᓪᓗᑎᒃ ᓄᓇᓕᐅᑉ ᒐᕙᒪᖓᑕ ᐱᔨᑦᑎᕋᕈᑎᖓᒍᑦ ᑖᒃᑯᐊ ᐱᑕᖃᕐᑎᑦᑎᕙᒃᑐᑦ ᐃᒥᖅᑕᐃᓂᕐᒥᒃ, ᑭᓈᓗᒃ ᒥᓪᓗᐊᖅᑕᐅᓂᖓᒍᑦ, ᐊᒻᒪᓗ ᐊᒃᑕᐃᓂᖅ.

2017 ᐱᒋᐊᕐᓂᖓᒍᑦ, ᑕᒪᕐᒥᒃ ᐃᒡᓗᖃᕐᑐᑦ ᐃᓚᒌᓄᑦ ᐃᖏᕐᕋᔾᔪᑎᖃᕐᐳᑦ: ᖃᒧᑕᐅᔭᐃᑦ ᐅᑭᐅᒃᑯᑦ ᐊᒻᒪᓗ ᓄᓇᐃᓐᓇᒃᑯᑦ ᐃᖏᕐᕋᔾᔪᑎᖃᕐᓗᑎᒃ (ᑎᓴᒪᓕᖕᓂᒃ) ᐊᐅᔭᓕᕌᖓᑦ. ᑖᒃᑯᐊ ᓄᓇᓯᐅᑏᑦ ᐊᑐᖅᑕᐅᕙᒃᐳᑦ ᐊᖑᓇᓱᒍᑕᐅᓪᓗᑎᒃ ᐱᓐᖑᐊᕈᑕᐅᑐᐃᓐᓇᕐᓗᑎᓪᓘᓐᓃᑦ. ᐊᐅᔭᐅᓕᕌᖓᑦ, ᐊᖑᓇᓱᒃᑎᑦ ᐊᐅᓚᐅᑎᓕᖕᓂᒃ ᐅᒥᐊᓂᒃ ᐊᑐᖃᑦᑕᕐᐳᑦ. ᐊᒥᓱᒐᓚᐃᑦ ᐊᐅᓱᐃᑦᑐᒥ ᐊᖑᓇᓱᒃᑏᑦ ᕿᒧᒃᓯᖃᐅᓕᕐᓯᒪᕗᑦ ᐊᑐᖅᑕᐅᕙᒃᑐᑦ ᓇᓐᓄᒐᓲᑕᐅᓪᓗᑎᒃ.

ᐊᖑᓇᓱᖕᓂᖅ ᐃᓄᐃᑦ ᐱᖅᑯᓯᖓᒍᑦ ᐱᒻᒪᕆᐅᖏᓐᓇᐅᔭᓕᒑᕗᖅ. ᐃᓄᑐᖃᐃᑦ ᐱᒻᒪᕆᐅᑎᑦᑎᓇᓱᐊᖃᑦᑕᕐᐳᑦ ᒪᒃᑯᓐᓂᕐᓴᐃᑦ ᑭᖑᕚᖏᓐᓂᒃ ᐊᖑᓇᓱᑦᑎᐊᕆᐊᖃᕐᓂᕐᒥᓂᒃ. ᐊᖑᔭᒥᓂᒃ ᐃᒃᓯᖕᓈᕆᑐᐃᓐᓇᕆᐊᖃᖏᒻᒪᑕ, ᐊᖑᔭᐅᔪᑦ ᒪᒪᖅᑑᒻᒪᑕ ᐊᒻᒪᓗ ᓂᕆᔭᒃᓴᑦᑎᐊᕙᐅᓪᓗᑎᒃ — ᖃᐅᔨᒪᔭᐅᓪᓗᓂ ‘ᐃᓄᐃᑦ ᓂᕿᖏᑦ’ — ᐃᑲᔫᑎᐅᕙᒻᒪᑕ ᐊᑭᑐᔪᑦ ᓂᐅᕕᕐᕕᒻᒥ ᓂᐅᕕᐊᑦ ᓂᕆᔭᒃᓴᓂᒃ.

ᐊᒥᓱᑦ ᐃᓄᐃᑦ ᐃᖅᑲᓇᐃᔭᖃᑦᑕᕐᐳᑦ ᕼᐊᒻᓚᒃᑯᓐᓄᑦ, ᐊᒡᓚᕝᕕᓕᕆᔨᐅᓪᓗᑎᒃ, ᓄᓇᓕᐅᑉ ᒐᕙᒪᖓᓂ ᐊᖅᑯᑎᐅᓪᓗᑎᒃ, ᓱᕋᒃᓯᒪᔪᓕᕆᔨᐅᓪᓗᑎᒃ, ᐃᖅᑲᓇᐃᔭᑲᐃᓐᓇᖃᑦᑕᕐᓗᑎᒃ ᐊᒻᒪᓗ ᓇᐃᑦᑐᒧᑦ ᐊᐅᔭᒃᑯᑦ ᐃᖅᑲᓇᐃᔭᖅᑎᐅᑲᐃᓐᓇᖃᑦᑕᕐᓗᑎᒃ. ᕼᐊᒻᓚᒃᑯᑦ ᐊᖓᔪᖅᑳᖑᓂᕐᓴᒥᒃ ᐊᐅᓚᑦᑎᔨᖃᕐᐳᑦ ᐊᒻᒪᓗ ᐊᖓᔪᖅᑳᒥᒃ ᐃᖅᑲᓇᐃᔭᖅᑎᖃᕐᓗᑎᒃ ᑲᒪᒋᔭᒃᓴᖃᕐᑐᖅ ᑭᓱᑐᐃᓐᓇᐃᑦ ᐊᐅᓚᑦᑎᐊᖁᓪᓗᒋᑦ.

ᑯᐊᐸᒃᑯᑦ, ᓂᐅᕕᕐᕕᓪᓗᐊᑕᕆᔭᐅᔪᖅ ᐊᐅᓱᐃᑦᑐᒥ, ᑭᓱᓕᒫᓄᑦ ᐊᖓᔪᖅᑳᖃᕐᐳᖅ, ᑲᒪᒋᔭᒃᓴᖃᕐᓗᓂ ᐊᐅᓚᑦᑎᓂᕐᒧᑦ ᑮᓇᐅᔭᓄᑦ ᑎᑎᕋᖅᑎᒥᒃ, ᓂᐅᕕᐊᓄᑦ ᓂᐅᕕᖅᑎᒥᒃ ᐊᒻᒪᓗ ᓱᕋᒃᓯᒪᔪᓕᕆᔨᖃᕐᓗᑎᒃ, ᐊᒻᒪᓗ ᑕᒪᕐᒥᒃ ᖃᖓᑕᓲᓄᑦ ᐅᓯᖐᔭᐃᓂᕐᒧᑦ, ᐃᓚᒋᔭᐅᓪᓗᓂ ᓂᐅᕕᓂᕐᒧᑦ ᐃᓄᐃᑦ ᓴᓇᐅᒐᖏᓐᓂᒃ ᓴᓇᓐᖑᐊᒐᖏᓐᓂᓪᓗ. ᐆᒡᓖᑦ ᓴᓇᕝᕕᒃ ᓇᖕᒥᓂᕆᔭᐅᕗᖅ ᓂᐅᕕᕐᕕᕋᓛᖑᕗᖅ ᓂᐅᕕᐊᒃᓴᖃᕐᐸᒃᑐᖅ ᓰᕐᓇᖅᑐᒐᓚᖕᓂᒃ.

ᐊᐃᕕᖅ ᐊᖑᓇᓱᒃᑐᓕᕆᔨᒃᑯᑦ (ᐊᖑᓇᓱᒃᑎᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ) ᐊᐅᓱᐃᑦᑐᒥ ᐊᐅᓚᑦᑎᕙᒃᐳᖅ ᑮᓇᐅᔭᓕᐅᕋᓱᐊᕐᓇᑎᒃ ᐊᐅᓪᓚᕈᔾᔨᔩᑦ ᑕᐃᔭᐅᓪᓗᓂ ᖁᑦᓯᑦᑐᕐᒥᐅᑦ ᐊᐅᓪᓚᕈᔾᔨᔩᑦ ᐊᔪᖏᓐᓂᖃᕐᑐᑦ ᐊᖑᓇᓱᒃᑎᑦᑎᕙᓪᓗᑎᒃ ᐊᖑᓇᓱᑐᐃᓐᓇᕈᒪᕙᒃᑐᓂᒃ ᓄᓇᕐᔪᐊᒥ ᓇᑭᑐᐃᓐᓈᕐᑐᓂᒃ. ᖁᑦᓯᑦᑐᕐᒥᐅᑦ ᐊᐅᓪᓚᕈᔾᔨᔩᑦ ᓂᐅᕕᕐᕕᖓᑦ ᓂᐅᕕᐊᒃᓴᖃᖃᑦᑕᕆᕗᖅ ᐊᖑᓇᓱᒃᑐᕐᓯᐅᑎᓂᒃ, ᓲᕐᓗ ᓴᕕᖕᓂᒃ, ᕿᔪᖕᓂᒃ ᖃᒧᑎᓕᐅᕈᑎᒃᓴᓂᒃ, ᐃᑲᓗᖕᓄᑦ ᓇᑦᑎᕐᓄᓪᓗ ᒪᑦᑎᑦᑕᐅᑎᓂᒃ, ᓂᕐᔪᑎᓄᑦ ᒥᑭᒋᐊᓂᒃ, ᐊᐅᓪᓚᖅᓯᒪᔪᖅᓯᐅᑎᑦ ᑲᒥᐊᓗᖕᓂᒃ, ᐃᓚᒋᔭᐅᓪᓗᑎᒃ ᐅᒥᐊᒃᑯᑦ ᐊᑦᑕᕐᓇᖅᑕᐃᓕᒪᔾᔪᑎᓂᒃ ᓲᕐᓗ ᕿᕕᔾᔭᐃᒃᑯᑎᑦ ᐊᓐᓄᕌᑦ.

ᐊᐃᕕᖅ ᐊᖑᓇᓱᒃᑐᓕᕆᔨᒃᑯᑦ ᐳᓚᕋᑎᑦᑎᖃᑦᑕᕆᕗᑦ ᐃᓄᐃᑦ ᓇᓄᕐᓄᑦ ᒥᑭᒋᐊᕐᓂᐊᕐᕕᕕᑐᖃᖓᓄᑦ ᑎᓴᒪᐅᔪᖅᑐᑦ ᑭᓛᒥᑕᓄᑦ ᐅᖓᓯᖕᓂᖃᕐᑐᖅ ᓕᓐᓯᑐᕋᒻ ᐱᓂᐊᓐᓱᓚᒥ, ᐅᕝᕙᓗ ᑕᐅᑐᒋᐊᖅᑐᕐᓗᑎᒃ ᐅᒥᖕᒪᖕᓂᒃ ᐅᖓᓯᖕᓂᖃᕐᑐᑦ ᐋᓐᔅᑎᐊᑦ ᕿᓐᖑᐊᓂ, ᐅᕝᕙᓗ ᖁᑦᑎᒃᑐᖅ ᐅᑭᐅᖅᑕᖅᑐᒥ ᐊᔾᔨᓕᐅᕆᑎᑕᐅᔭᖅᑐᕐᓗᑎᒃ ᐅᒥᐊᒃᑯᑦ. ᐅᐱᕐᖓᒃᓵᒃᑯᑦ ᕿᒧᒃᓯᒃᑯᑦ ᐃᑭᒪᔪᒪᔪᓐᓇᕐᐳᑎᑦ ᐋᖅᑭᒃᓱᕐᓯᒪᔪᑎᒍᑦ. ᐊᐅᔭᒃᑯᑦ, 24-ᐃᑲᕐᕋᓄᑦ ᖃᐅᒪᐃᓐᓇᖃᑦᑕᓕᕐᑎᓪᓗᒍ, ᐃᓄᐃᑦ ᐊᐅᓪᓛᖅᓯᒪᒐᔪᓕᖃᑦᑕᕐᐳᑦ ᐊᖑᓇᓱᒋᐊᕐᓗᑎᒃ, ᐃᖃᓪᓕᐊᕐᓗᑎᒃ, ᐊᐅᓪᓛᖅᓯᒪᓚᐅᑲᒋᐊᖅᑐᕐᓗᑎᒃ ᐊᒻᒪᓗ ᐃᓅᓯᖕᒥᒃ ᖁᕕᐊᒋᔭᖃᑐᐃᓐᓇᕐᓂᒃᑯᑦ. ᐃᓄᕈᖅᐹᓪᓕᕈᑕᐅᖃᑦᑕᕐᐳᖅ. ᑕᑯᔭᖅᑐᕈᒪᓯᒪᒍᕕᑦ ᖁᑦᑎᓐᓂᖅᐹᖅ ᒥᕐᖑᐃᖅᓯᕐᕕᒻᒥᒃ, ᐊᑲᐅᓈᕋᔭᕐᐳᖅ ᓄᖅᑲᑲᐃᓐᓇᕐᓗᑎᑦ ᐊᐅᓱᐃᑦᑐᒧᑦ ᑐᓐᖓᓱᒃᑎᑕᐅᓂᒃᑯᑦ ᐳᓛᕆᐊᕐᓗᒋᑦ ᑕᐃᑯᓐᖓᐅᕙᓪᓕᐊᓂᐊᓕᕈᕕᑦ, ᐊᒻᒪᓗ ᐅᑎᖅᐸᓪᓕᐊᓂᕆᔭᒃᑯᑦ.

ᑐᖁᕋᕐᕕᕕᓂᖅ ᕼᐊᐳ ᕕᐅᑦᒥ ᑕᐃᑲᓂ ᖃᓄᐃᒋᐊᓐᖓᖅᓯᒪᔪᖃᕐᓂᑰᔪᒥ ᐳᓛᕆᐊᕐᓇᕐᑐᖅ. ᓴᓐᓂᖓᔪᓕᒃ ᐱᖑᐊᕐᔫᑉ ᖄᖓᓂ ᓄᐊᕖᔭᓐᒥᐅᑕᖅ ᐊᑐ ᓱᕗᑦᕋᑉ ᐃᓅᔪᓐᓃᔨᐊᖃᓚᐅᕐᓯᒪᖕᒪᑦ ᐅᒥᐊᖅᑐᕐᑎᖁᑎᖏᓐᓂᒃ, ᕗᕋᒻ ᕕᐅᑦᒧᑦ ᐳᓛᕆᐊᕈᒪᓗᑎᑦ ᐋᖅᑭᒃᓱᐃᔪᓐᓇᕆᕗᑎᑦ, ᐃᒡᓗᕋᓛᓕᐅᕐᕕᐅᔪᕕᓂᖅ ᓱᕗᑦᕋᑉ ᓯᓚᑦᑎᐊᕙᓐᖑᕐᓰᕝᕕᕕᓂᖓ.

ᑰᐳᒡ ᕿᑭᖅᑕᖅ ᑎᒃᑯᐊᖅᑕᐅᓯᒪᕗᖅ ᑎᒥᐊᖃᕐᕕᐅᕗᖅ ᐊᑦᑎᖅᑕᐅᓯᒪᓪᓗᓂ ᓂᕐᔪᑎᖃᕐᕕᒃ ᓄᓇᕗᑦ ᐊᕕᒃᑐᖅᓯᒪᓂᐊᑕ ᒐᕙᒪᒃᑯᖏᓐᓂ 1995-ᖑᑎᓪᓗᒍ. ᑕᐅᓴᖏᓐᓃᑦᑐᑦ ᐃᖏᕐᕋᕙᒃᑐᑦ ᑎᖕᒥᐊᑦ ᒪᓐᓂᓕᐅᕐᕕᒋᕙᒃᑕᖓᑦ ᐊᐅᔭᒃᑯᑦ. ᐳᐃᔨᖃᐅᕐᑐᖅ, ᓲᕐᓗ ᐅᒡᔪᐃᑦ, ᐊᒻᒪ ᓇᓄᐃᑦ.

ᐊᕐᕌᒍᑕᒫᑦ ᓇᓐᓄᒃᑕᐅᔪᓐᓇᕐᑐᑦ ᑭᒡᓕᖃᕐᕕᐊ ᐊᕕᒃᑕᐅᕙᒃᐳᖅ ᒪᕐᕈᐃᓕᖓᔪᑎᒍᑦ: ᐊᕐᕕᓂᓕᖕᓂᑦ-ᖁᓕᐅᓐᖏᓱᖓᕐᑐᓄᑦ ᓂᕕᖓᑖᑦ ᓴᓂᕐᕙᒃᑕᐅᕙᒃᐳᑦ ᐊᕐᕌᒍᑕᒫᒧᑦ ᐳᓛᕆᐊᖅᓯᒪᔪᑦ ᐊᖑᓇᓱᒋᐊᑐᐃᓐᓇᕐᐸᒃᑐᓄᑦ, ᐊᒥᐊᒃᑯᐃᑦ ᓂᕕᖓᑖᑦ ᐃᓄᖕᓅᖓᓪᓗᑎᒃ ᐊᐅᓱᐃᑦᑐᕐᒥᐅᓄᑦ ᓇᓐᓄᒐᓱᒃᑕᐅᔪᓐᓇᕐᓗᑎᒃ ᓂᕿᒃᓴᕆᓂᐊᕐᓗᓂᔾᔪᒃ − ᓂᕿᒋᔭᐅᓗᑎᒃ ᐊᓐᓄᕌᓕᐊᖑᓗᑎᓪᓗ. ᐊᖑᓇᓱᒃᑏᑦ ᓄᖒᑦᑎᔪᓐᓇᖅᐸᓐᖏᓚᑦ ᐊᕐᕌᒍᑕᒫᑦ ᐱᔭᐅᔪᓐᓇᕐᓂᖏᑕ ᑭᒡᓕᖃᕐᕕᖓᓂᒃ. ᓇᓗᖏᑦᑎᐊᕐᐳᑦ, ᖃᐅᒪᔨᒪᒐᒥᒃ ᓇᓄᐃᑦ ᐊᑯᓂᐅᔪᒧᑦ ᐱᑕᖃᐃᓐᓇᓕᒑᓂᖏᓐᓂᒃ!

Visitez Grise Fiord:
bienvenue au sommet
du globe