ᓄᓇ

ᐊᐅᓱᐃᑦᑐᖅ ᐃᓂᖓᓃᑉᐳᖅ 76 ᖁᕝᕙᓯᖕᓂᖓᓂ, 25 ᒥᓂᑦᔅ ᐅᐊᖕᓇᖓᓂ, ᐅᖓᓯᖕᓂᖃᑐᐃᓐᓇᕐᐳᖅ 1,517 ᑭᓛᒥᑕᓄᑦ ᓄᓇᕐᔪᐊᑉ ᑲᔾᔨᖓᓂᑦ! ᑕᕝᕙᓂ ᖁᑦᑎᒃᑐᖅ ᐅᑭᐅᖅᑕᕐᑐᒥ ᖁᑦᑎᓐᓂᕆᔭᖓᓂ, ᓯᓚ ᐊᒻᒪᓗ ᐊᕐᕌᒎᑉ ᐃᓚᖏᓐᓂ ᐊᔾᔨᒌᖏᑦᑐᒥᒃ ᐊᑯᓂᐅᓂᖃᖃᑦᑕᕐᐳᑦ. ᓄᓇᕐᔪᐊᑉ ᐅᐊᖕᓇᖓᓂ ᓯᕿᓂᖅ ᐅᑎᓕᖃᑦᑕᕐᒪᑦ ᐅᑭᐅᖑᓕᕌᖓᑦ, ᑎᓯᐱᕆ 21, ᐊᒻᒪᓗ ᓴᖅᑭᓕᖃᑦᑕᕐᐳᖅ ᐊᐅᔭᒃᑯᑦ, ᔫᓂ 21. ᑕᐃᒪᐃᒃᑲᓗᐊᕐᑎᓪᓗᒍ, ᑕᑭᓂᖓ ᓯᕿᓐᓂᕐᓂᕆᕙᒃᑕᕗᑦ ᐊᐅᔭᐅᑎᓪᓗᒍ (ᐊᒻᒪ ᐅᓪᓗᕆᐊᕗᑦ ᖃᐅᒻᒪᕆᓕᖃᑦᑕᕐᐳᖅ ᐅᑭᐅᒃᑯᑦ) ᐱᓗᐊᖃᑦᑕᕐᐳᑦ ᑕᒫᓂ ᐅᑭᐅᖅᑕᖅᑑᑉ ᑭᒡᓕᓐᖑᐊᖓᑕ ᖁᓕᖓᓃᕕᔾᔪᐊᕋᓗᐊᕐᑎᓪᓗᒍ.

ᐃᐳᕈ 8-ᖑᓕᕐᑎᓪᓗᒍ ᑖᖅᓯᓪᓚᕆᖃᑦᑕᖏᒻᒪᑦ ᕿᓚᒻᒥ. ᓯᕿᓐᓂᓕᓵᕐᓂᖓ ᓇᓗᓇᖅᓯᕙᒃᐳᖅ ᐊᒃᐸᕐᐸᓪᓕᐊᓂᖓᓂᑦ ᓯᓚᒥ ᖃᐅᒻᒪᕆᓗᐊᕐᓂᖓᓄᑦ. ᕿᔾᔨᖃᑦᑕᕐᐳᖅ ᖃᐅᑕᒫᐸᓗᒃ ᐅᐱᕐᖓᒃᓵᖑᓕᕌᖓᑦ ᐅᓪᓗᒐᓴᖕᓄᑦ. ᐃᓐᓇᕆᐊᖅᑐᖃᑦᑕᕐᐳᑦ ᓯᕿᓐᓂᕐᑎᓪᓗᒍ ᓱᓕ ᐊᒻᒪ ᐃᖅᑯᒻᒪᕆᓪᓗᑎᒃ ᓯᕿᓂᖅ ᖁᕝᕙᓯᒃᑐᒻᒪᕆᐅᑎᓪᓗᒍ ᓯᕿᓐᓂᖅᑐᒻᒪᕆᐅᑎᓪᓗᒍ ᓱᓕ. ᐅᐱᕐᖔᒃᑯᑦ ᐃᐳᕈᒥ ᒪᐃᒥᓗ, ᓯᕿᓐᓃᓐᓇᖃᑦᑕᓕᕐᑎᓪᓗᒍ ᐊᐱᓯᒪᑦᑎᐊᕐᑎᓪᓗᒍ ᐊᒻᒪ ᑕᕆᐅᖅ ᓯᑯᖃᑦᑎᐊᕐᑎᓪᓗᒍ, ᐅᖓᓯᒃᑐᒧᑦ ᐃᖏᕐᕋᔪᓐᓇᖃᑦᑕᕐᐳᑦ ᖃᒧᑕᐅᔭᒃᑯᑦ. ᓄᖅᑲᕈᑎᒋᔪᓐᓇᖅᑕᑐᐊᓪᓕ ᑕᖃᑲᐃᓐᓇᕐᓂᖅ. ᑭᒃᑯᓕᒫᑦ ᑕᕝᕙᓂ ᖁᕕᐊᒋᔭᖃᖃᑦᑕᕐᒪᑕ 24 ᐃᑲᕐᕋᓄᑦ ᖃᐅᒪᐃᓐᓇᖃᑦᑕᓕᕐᑎᓪᓗᒍ ᐊᑯᓂᐅᓂᖃᕈᓐᓇᕐᑐᑦ ᒪᐃᒥᑦ ᐋᒌᓯᐅᑉ ᓄᓐᖑᐊᓄᑦ. ᐊᕐᕌᒍᒥ ᐱᐅᓂᖅᐹᖑᕗᖅ ᐊᐅᓪᓛᖅᓯᒪᑲᐃᓐᓇᕐᓗᓂ, ᐃᓚᒋᔭᑎᑦ ᐃᓚᒋᓗᒋᑦ, ᖁᔭᒋᓗᒍ ᓄᓇ. ᐱᐅᓂᖓ ᖁᑦᑎᒃᑐᒥ ᐅᑭᐅᖅᑕᖅᑐᖅ ᐱᐅᔪᒻᒪᕆᐊᓘᕗᖅ.

ᐅᑭᐅᖅᑕᖅᑐᒥ ᐱᕈᖅᓯᐊᑦ ᐱᕈᑦᑎᐊᖃᑦᑕᕐᐳᑦ ᐊᐅᔭᖅ ᓇᐃᑦᑑᒐᓗᐊᕐᑎᓪᓗᒍ. ᐱᐅᓂᕆᔭᖏᑦ ᓇᐃᑦᑑᒐᓗᐊᕐᑎᓪᓗᒋᑦ. ᐱᕈᖅᑐᑦ ᐃᓚᖃᕐᐳᑦ ᐸᐅᓐᓇᐃᑦ, ᐊᐃᕋᐃᑦ/ᐊᐅᐱᓚᑦᑐᓐᖑᐊᖑᖁᐃᔨᔪᑦ, ᐊᐅᐱᓚᑦᑐᓐᖑᐊᑦ, ᖃᑯᖅᑕᐃᑦ ᐱᕈᖅᓯᐊᑦ ᐊᒻᒪᓗ ᖁᖅᓱᑦᑐᑦ ᐱᕈᖅᓯᐊᑦ ᑐᖅᑕᐃᑦ.

ᔫᓂ 21, ᐊᐅᔭᓐᖑᕐᑎᓪᓗᒍ, ᑲᓇᑕᒥ ᓄᓇᖃᖅᑳᕐᓯᒪᔪᑦ ᐅᐃᐃᓪᓗᖓ, ᓯᕿᓂᖅ ᖁᕝᕙᓯᖕᓂᖅᐹᖓᓃᖃᑦᑕᕐᐳᖅ. ᓄᓇᕐᔪᐊᑉ ᑲᔾᔨᖓᓂ, ᐊᐅᔭᒃᑯᑦ ᓯᕿᓂᖅ ᐅᓪᓗᓕᒫᒃᑯᑦ ᐅᐃᔾᔮᖃᑦᑕᕐᐳᖅ 23.5 ᖁᕝᕙᓯᖕᓂᖓᒍᑦ ᓯᓚᐅᑉ ᖁᓕᖓᒍᑦ. ᓱᕈᓰᑦ ᐃᓐᓇᐃᓪᓗ ᐅᓐᓄᐊᖅᓯᐅᓕᖃᑦᑕᕐᐳᑦ, ᐃᓛᓐᓂᒃᑯᑦ ᐃᖅᑯᒻᒪᖃᑦᑕᕐᐳᑦ 9:00 ᐅᓐᓄᒃᑯᑦ ᐊᒻᒪᓗ ᓯᓂᒐᓱᓕᕐᓗᑎᒃ 9:00 ᐅᓪᓛᒃᑯᑦ. ᐃᓕᓐᓂᐊᓐᖏᑎᓪᓗᒋᑦ ᐊᐅᔭᒃᑯᑦ ᕿᑲᕐᓇᕐᓯᑎᓪᓗᒍ, ᓱᕈᓰᑦ ᓯᓂᒃᑎᑕᐅᖏᓐᓇᕈᓐᓇᖃᑦᑕᕐᐳᑦ ᓯᓂᒍᓐᓇᕐᓕᒫᒥᒍᑦ.

ᖁᑦᑎᒃᑐᖅ ᐅᑭᐅᖅᑕᕐᑐᖅ ᐅᑭᐅᖅᑕᕐᑐᓪᓚᕆᐅᕗᖅ. ᓯᓚᓗᓗᐊᖃᑦᑕᓐᖏᓚᖅ. ᔫᓂᐅᑉ ᓄᓐᖑᐊᓂ ᐊᐳᑎᖃᓐᖏᓗᐊᓕᖃᑦᑕᕐᐳᖅ ᖃᒧᑕᐅᔭᒃᑰᕋᓱᓪᓗᓂ, ᑭᓯᐊᓂ ᐃᖏᕐᕋᔪᓐᓇᖃᑦᑕᕐᐳᑦ ᓱᓕ ᓯᑯᒃᑯᑦ. ᐋᒌᓯᒥ ᐱᖓᔪᖓᑕ ᐱᓇᓱᐊᕈᓯᖓᓂ, ᓯᕿᓂᖅ ᐊᒃᐸᕐᐸᓪᓕᐊᓕᖃᑦᑕᕐᐳᖅ ᖃᐅᑕᒫᑦ. ᐊᑯᓪᓕᖅᐹᖓᒍᑦ ᐃᒃᑮᓇᕐᓂᖓ ᐊᑦᑎᒃᓯᓗᐊᕌᓗᖃᑦᑕᓐᖏᓚᖅ ᖁᐊᕐᓇᖅᑐᒧᑦ ᑭᓯᐊᓂ ᓯᑎᐱᕆ ᐱᒋᐊᓕᓵᕐᑎᓪᓗᒍ. ᖁᐊᕐᓇᖅᓯᑕᐃᓐᓇᖃᑦᑕᓕᕐᒪᑦ ᐅᓪᓗᐃᑦ ᑭᖑᓂᑐᖃᖓᒎᓕᕐᑎᓪᓗᒍ ᐊᕐᕌᒍᑕᒫᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᓱᓕ, ᑲᒪᑦᑕᐃᓕᒋᑦ ᖃᑯᑎᒃᑯᑦ ᖃᓂᑳᓪᓚᒐᔭᕐᓂᖓᓂᒃ ᐊᐅᔭᐅᑎᓪᓗᒍ! ᖁᑦᑎᒃᑐᖅ ᐅᑭᐅᖅᑕᕐᑐᒥ ᑕᐃᒪᐃᓪᓚᓚᐅᓲᖑᒻᒪᑦ. ᐊᐱᕋᑖᓕᖃᑦᑕᕐᐳᖅ ᐅᑭᐊᒃᓵᖑᓕᕌᖓᑦ. ᐅᑐᐱᕆᐅᓕᕐᑎᓪᓗᒍ ᖃᒧᑕᐅᔭᕈᓐᓇᓕᒃᑲᓐᓂᕈᓐᓇᖃᑦᑕᕐᐳᑎᑦ ᓄᓇᒃᑯᑦ.

ᐊᑯᓪᓕᖅᐹᖓᒍᑦ ᐃᒃᑮᓇᕐᓂᕆᔭᖓ ᑕᒫᓂ ᐃᒪᐃᑦᑑᕙᒃᐳᑦ: ᔮᓄᐊᕆᒥᑦ ᒫᔨᒧᑦ - 26°C; ᐃᐳᕈᒥ -14°C; ᒪᐃᒥ -2°C; ᔫᓂᒥᑦ ᑎᑭᓪᓗᒍ ᐋᒌᓯᒧᑦ +5°C; ᓯᑎᐱᕆᒥ -2°C; ᐅᑐᐱᕆᒥ -13°C; ᓄᕕᐱᕆᒥ -20°C; ᑎᓯᐱᕆᒥ -26°C.

ᓯᓚᕐᔪᐊᑉ ᐅᖅᑰᓯᕙᓪᓕᐊᓂᖓᓄᑦ ᒫᓐᓇ ᐃᒃᑮᓇᓗᐊᕋᓗᖃᑦᑕᕈᓐᓃᕐᒪᑦ, ᑭᓯᐊᓂ ᑕᐃᒪᐃᑉᐸᒃᐳᖅ ᓱᓕ. ᐱᐅᓂᖅᐹᖑᕗᖅ ᐅᐸᓗᖓᐃᔭᕐᓯᒪᓗᓂ ᐃᒃᑮᓇᕐᓯᑳᓪᓚᒃᑲᔭᕐᓂᖓᓄᑦ ᖃᖓᑐᐃᓐᓇᓕᒫᖅ ᐊᕐᕌᒍᒥ. ᐃᒃᑮᓇᖏᓐᓂᕐᓴᐅᕙᓕᕐᑎᓪᓗᒍ ᐅᑭᐅᒃᑯᑦ ᐃᓚᓕᐅᔾᔨᓯᒪᖅᑯᐃᔨᕙᓕᕐᒪᑦ ᖃᐅᒪᒃᓴᕋᐃᓐᓂᕐᓴᐅᕙᓕᕐᓂᖓᓂᒃ. ᑕᑯᓇᖅᓯᒐᔪᓕᕐᒪᑦ ᖃᐅᒪᓂᕐᓴᐅᕙᓕᓂᖓᓂᒃ ᑖᖏᓐᓇᖃᑦᑕᓕᕐᑎᓪᓗᒍ.

ᖁᑦᑎᒃᑐᖅ ᐅᑭᐅᖅᑕᕐᑑᑉ ᓄᓇᖓ ᐊᔾᔨᐅᖏᓐᓂᖓᓄᑦ ᖃᐅᔨᓴᖅᑕᐅᔪᒪᕙᒻᒪᑦ ᖃᐅᔨᓴᖅᑐᓕᕆᔨᓂᑦ ᐊᒻᒪᓗ ᐃᓕᓐᓂᐊᕐᕕᔾᔪᐊᒻᒪᕆᒻᒥ ᐃᓕᓐᓂᐊᖅᑎᓂᑦ ᐊᒥᓱᑦ ᐃᓕᓐᓂᐊᕐᑕᐅᔪᓂᑦ ᐃᓚᒋᔭᐅᓪᓗᑎᒃ, ᐊᐅᔪᐃᑦᑐᓕᕆᓂᖅ, ᐃᑦᑕᕐᓂᓴᓕᕆᓂᖅ, ᓂᕐᔪᑎᑦ ᐱᕈᖅᑐᓪᓗ ᐅᔭᕋᓐᖑᖅᓯᒪᓂᖏᓐᓄᑦ ᖃᐅᔨᓴᓂᕐᒥᒃ ᐊᒻᒪ ᓄᓇᓕᕆᓂᕐᒥᒃ. ᑖᓐᓇ ᐃᓂᑐᖃᒻᒪᕆᐅᔪᖅ ᓇᐹᖅᑐᖃᐅᖅᑐᒻᒪᕆᐅᓚᐅᕐᓯᒪᕗᖅ! ᓇᓄᕐᓄᑦ ᓄᓇᒋᔭᐅᓕᓚᐅᖅᑎᓐᓇᒍᓘᓐᓃᑦ! ᐅᑭᐅᖅᑕᕐᑑᑉ ᓯᑯᖓᓂᒃ ᖃᐅᔨᓴᕐᓂᕐᒧᑦ ᐱᓕᕆᐊᖅ, ᖃᐅᓱᐃᑦᑐᒦᑦᑐᖅ, ᒐᕙᒪᑐᖃᒃᑯᓐᓂ ᓄᒃᑕᖅᑐᓕᕆᓂᕐᒧᑦ ᐃᑲᔪᖅᓱᐃᓂᕐᒥᒃ ᐱᓕᕆᐊᖓᑦ ᖃᐅᔨᓴᖅᑕᐅᖁᓪᓗᒍ ᖁᑦᑎᒃᑐᒥ ᐅᑭᐅᖅᑕᖅᑐᖓ. ᐅᐱᕐᖓᒃᓵᑕᒫᑦ ᐊᐅᔭᒃᑯᓪᓗ ᖃᐅᔨᓴᕐᕕᖃᖃᑦᑕᕐᒪᑕ ᑕᕝᕙᓂ ᐱᓕᕆᐊᒥ. ᓇᓪᓕᐊᑐᐃᓐᓇᖅ ᑕᒪᕐᒥᓕᒫᕐᓘᓐᓃᑦ ᖃᐅᔨᓴᖅᑐᓕᕆᔨᐅᔪᑦ ᑕᒫᓂ ᖃᐅᔨᓴᕈᒪᔪᑦ ᖃᐅᔨᒃᑲᐃᖅᑳᕆᐊᖃᕐᐳᑦ ᖃᓂᓐᓂᕐᐹᖅ ᓄᓇᓕᐅᔪᒧᑦ. ᐱᓇᓱᐊᕈᑎᒋᔭᐅᔪᑦ ᖃᐅᔨᓴᖅᑕᐅᑦᑎᐊᖄᖃᑦᑕᕐᐳᑦ ᐊᖏᖅᑕᐅᓚᐅᖅᑳᖏᓐᓂᕐᒥᓂᒃ.

Visitez Grise Fiord:
bienvenue au sommet
du globe