ᐃᓄᐃᑦ

ᐊᐅᓱᐃᑦᑑᑉ ᕼᐊᒻᓚᖓᑦ ᐊᖏᕐᕋᕆᔭᐅᕗᖅ 130 ᓄᓇᖃᐃᓐᓇᓕᕐᓯᒪᔪᑦ ᐱᒋᐊᕐᓗᓂ ᑎᓯᐱᕆ 2016. ᐊᒥᓱᑦ ᐅᖓᓯᒃᑐᕐᒥᐅᑎᑐᑦ ᓄᓇᕐᔪᐊᒥ, ᓇᖕᒥᓂᖅ ᐊᔾᔨᐅᖏᑦᑐᒥᒃ ᐅᖃᐅᓯᖃᕐᐳᒍᑦ, ᐊᔾᔨᒌᖏᑦᑐᑦ ᐃᓄᒃᑎᑐᑦ ᐱᒋᐊᕐᓯᒪᔪᖅ 1953-ᒥ ᓅᑕᐅᓯᒪᓂᖏᓐᓄᑦ ᐃᓚᒋᔭᕗᑦ. ᑲᑎᓯᒪᔪᖅ ᑯᐸᐃᒃ ᑕᕐᕋᖓᑕ ᐊᒻᒪᓗ ᑐᓄᓂᕐᒥᐅᑦ (ᕿᑭᖅᑖᓘᑉ ᐅᐊᖕᓇᖓᓂ) ᐅᖃᐅᓯᖏᓐᓂᒃ. ᐃᓄᐃᑦ ᐅᖃᐅᓯᖓᑦ (‘ᐃᓄᒃᑐᑦ’ - ᐃᓚᓕᐅᔾᔨᓯᒪᓪᓗᓂ ᑕᒪᕐᒥᒃ ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ, ᐅᐃᕖᑎᑐᓪᓗ ᐱᖓᓲᕗᑦ ᐃᓕᓴᕆᔭᐅᓯᒪᔪᑎᒍᑦ ᐅᖃᐅᓯᐅᕗᑦ ᓄᓇᕗᒥ. ᖃᓪᓗᓇᐅᔭᕐᓂᖅ ᑐᑭᓯᒋᐊᕈᑎᒋᔭᐅᕙᖕᓂᕐᓴᐅᓕᕐᒪᑦ ᐊᖏᕐᕋᕆᔭᐅᔪᓂ. ᖁᕕᐊᓇᖏᑦᑐᒃᑯᑦ, ᐃᓄᐃᑦ ᐅᖃᐅᓯᖓᓂᒃ ᓇᐅᑦᑎᐅᒪᓇᓱᐊᕐᓂᒃᑯᑦ, ᖃᓪᓗᓇᐅᔭᓂᕐᓴᐅᕙᓕᕐᒪᑕ 65 ᐊᕐᕌᒎᓯᒪᓕᕐᑐᓂ.

1970-ᖑᓕᕐᑎᓪᓗᒍ, ᑕᒪᕐᒥᐸᓗᒃ ᐃᓄᐃᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᑎᕈᓯᖃᓚᐅᖏᒻᒪᑕ. ᐊᑑᑎᒋᓐᖑᐊᕐᓗᒍ, ᐊᕿᐊᑐᓱᒃ ᐃᓚᒌᑦ ᐃᓚᓕᐅᔾᔨᓯᒪᕗᖅ ᐹᑎ, ᐊᐃᓴ, ᐊᕿᐊᑐᓱᒃ (1953), ᐊᕿᐊᕈᖅ (1958), ᓂᖏᐅᖅ (1960), ᐸᐅᓗᓯ (1953) ᐊᒻᒪᓗ ᐱᔭᒥᓂ (1962). ᐃᓚᒌᒃᑐᑐᐊᑦ ᐊᑎᕈᓯᖃᓚᐅᕐᑐᑦ ᑐᕿᖅᑭ ᑭᒍᑦᑕᖅ (1964). ᑭᖑᓂᐊᒍᓪᓗ, 1970-ᒥ, ᐊᐃᐸᕋᕼᐊᒻ ᐅᒃᐱᒃ ᐃᓄᐃᑦ ᐃᒡᓗᖏᓐᓄᐊᖅᑕᓚᐅᕐᒪᑦ ᐊᑎᕈᓯᖅᑖᑎᑦᑎᕙᓪᓕᐊᓪᓗᓂ. ᐊᐅᓱᐃᑦᑐᒥ ᐊᑐᓂ ᐃᓄᒃ ᐊᑎᕈᓯᖃᓕᓚᐅᕐᑐᖅ ᓇᖕᒥᓂᖅ ᓂᕈᐊᕆᔭᒥᓂᒃ. ᐃᓚᖏᑦ ᓂᕈᐊᖅᓯᒪᕗᑦ ᕚᖅᑎᑕᐅᓂᖓᑕ ᐊᑎᖓᓂᒃ. ᓕᐅᕆ ᐊᐅᓪᓚᓗᒃ ᐊᑎᖃᓕᕐᓗᓂ ᓕᐅᕆ ᐊᕿᐊᑐᓱᒃ ᐊᐅᓪᓚᓗᒃ, ᐸᐅᓗᓯ ᐊᑎᖃᓕᕐᓗᓂ ᐸᐅᓗᓯ ᓄᓐᖓᖅ, ᐊᕿᐊᕈᖅ ᐊᑎᖃᓕᕐᓗᓂ ᒐᒪᐃᓕ ᐊᕿᐊᕈᖅ, ᓂᖏᐅᖅ ᐊᑐᕐᓯᒪᕗᖅ ᐊᑖᑕᖓᑕ ᐊᑎᖓᓂᒃ ᐊᑎᖃᓕᕐᓗᓂ ᓂᖏᐅᖅ ᕿᓕᖅᑎ, ᐊᒻᒪ ᐱᔭᒥᓂ ᐊᑎᖃᓕᕐᓗᓂ ᐊᐃᐸᕋᕼᐊᒻ ᐱᔭᒥᓂ, ᑐᕿᖅᑭ, ᓄᓇᓕᖓᓂ ᐊᖏᖅᑕᐅᓯᒪᓚᐅᕐᐳᖅ, ᐊᑐᑐᐃᓐᓇᕐᓯᒪᓪᓗᓂᐅᒃ ᐊᑐᐃᓐᓇᖃᑦᑕᕐᓯᒪᔭᖓᓂᒃ, ᑐᕿᖅᑭ ᑭᒍᑦᑕᖅ.

ᐃᓚᖏᑦ ᐃᓄᐃᑦ ᐊᐅᓱᐃᑦᑐᒥ ᐃᒃᐱᒍᓱᒃᐳᑦ ᐱᒻᒪᕆᐅᔪᑎᒍᑦ ᐊᑐᕐᓂᖃᐅᑎᖃᓂᕐᒥᓂᒃ ᑲᓇᑕᐅᑉ ᑭᒡᓕᖓᓂᒃ ᐅᖓᓯᒃᑐᖅ ᐅᑭᐅᖅᑕᕐᑐᒥᒃ ᓴᐳᒻᒥᑦᑎᓂᕐᒧᑦ. ᖃᓂᓐᓂᕐᐸᖅ ᓄᓇᐅᓪᓗᓂ ᓄᓇᕐᔪᐊᑉ ᑲᔾᔨᖓᓂ ᓄᓇᕗᑦ, ᑲᓇᑕᒥ. ᐊᓱᐃᑦᑐᖅ ᐃᓂᖓᓃᒻᒪᑦ 943 ᒪᐃᓕᑐᐃᓐᓇᕐᓄᑦ (1517 ᑭᓛᒥᑕᓄᑦ) ᑖᔅᓱᒪᓐᖓᑦ. ᓄᓇᕐᔪᐊᑉ ᐱᖁᔭᖓᒍᑦ, ᓄᓇᓕᕐᔪᐊᖅ ᓇᖕᒥᓂᖃᖏᒻᒪᑦ ᓄᓇᕐᔪᐊᑉ ᑲᔾᔨᖓᓂᒃ ᐅᕝᕙᓗ ᐅᑭᐅᖅᑕᕐᑑᑉ ᐃᒪᖓᓂᒃ ᐊᕙᓗᓯᒪᔭᖓᓂᒃ. ᑲᓇᑕ ᐃᓚᒋᔭᐅᖃᑕᐅᒻᒪᑦ ᑕᓪᓕᒪᓂ ᐅᑭᐅᖅᑕᖅᑐᒥ ᓯᔾᔭᖓᓂ ᓄᓇᓕᕐᔪᐊᖑᔪᓂ − ᐃᓚᓕᐅᔾᔨᓯᒪᓪᓗᓂ ᒥᐊᓕᒐᐃᑦ, ᕋᓯᐊ, ᓄᐊᕗᐃ ᐊᒻᒪ ᑎᐊᓐᒫᒃ (ᐊᖅᑯᑎᒋᓪᓗᒍ ᑲᓛᖦᖠᑦ ᓄᓈᑦ) − ᒫᓐᓇᐅᔪᒥ ᑭᐅᓗᖃᑎᒌᒍᑎᖃᕐᓯᒪᕗᑦ ᑭᓇ ᓇᖕᒥᓂᖃᕐᒪᖔᑦ ᐅᑭᐅᖅᑕᖅᑑᑉ ᓯᑯᖓᑕ ᓄᓇᖏᓐᓂᒃ ᐃᓂᖃᕐᑐᖅ ᐅᑭᐅᖅᑕᕐᑑᑉ ᐃᒪᖓᑕ ᐊᑖᓂ. ᑲᓛᖦᖠᑦ ᓄᓈᑦ ᐃᓚᒋᔭᐅᖃᑕᐅᒍᓗᐊᕐᑎᓪᓗᒍ ᑎᐊᓐᒫᒃ ᐊᕕᒃᑐᖅᓯᒪᓂᐊᓄᑦ, ᑕᒪᕐᒥᐸᓕᒃ ᐃᓄᐃᑦ ᑲᓇᑕᒦᑦᑐᑦ ᐃᒃᐱᒍᓱᖕᒪᑕ ᓯᕗᓕᖃᓂᕐᒥᓂᒃ ᑲᓛᖦᖠᑦ ᓄᓈᑕ ᐃᓄᖏᓐᓂᒃ ᓴᓐᖏᓂᕐᓴᐅᓂᖓᓂᒃ ᑖᒃᑯᓇᓐᖓᓪᓕ ᓄᓇᓕᕐᔪᐊᑦ ᑭᒡᓕᖃᕐᕕᒋᔭᖏᓐᓂ. ᐃᒃᐱᒍᓱᒃᐳᑦ ᑖᒃᑯᐊ ᐃᓄᐃᑦ ᓴᓂᓕᕇᖕᓂᕐᒥᓂᒃ ᐊᒻᒪᓗ ᐊᓪᓚᐅᖏᓐᓂᖏᓐᓂᒃ. ᐱᐅᓂᓴᐅᔪᖅ ᓄᓇᕐᔪᐊᑉ ᐅᑭᐅᖅᑕᖅᑐᖏᓐᓂ, ᐃᓄᐃᑦ ᑲᓇᑕᒥᑦ, ᑲᓛᖦᖠᑦ ᓄᓈᑦᓂ, ᕋᓯᐊ ᐊᒻᒪ ᐊᓛᔅᑲᒥᐅᑦ ᐱᑕᖃᕈᓐᓃᕐᑎᑦᑎᒐᔭᕐᐳᑦ ᑭᒡᓕᖃᕐᓂᕆᔭᖏᓐᓂᒃ.

ᐃᓄᒃᑎᑐᑦ ᐊᑎᖓ ᒍᕇᔅ ᕕᐅᑦ (Grise Fiord) ‘ᐊᐅᓱᐃᑦᑐᖅ’ ᑐᑭᖃᕐᐳᖅ ‘ᓄᓇ ᐊᐅᓚᐅᖅᓯᒪᖏᓐᓂᖓᓂᒃ.’ ᑐᓵᔨ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᕐᑐᖅ ᐃᓄᒃᑎᑐᑦ ᐊᑎᖅᑖᕐᑎᑦᑎᓚᐅᕐᓯᒪᕗᖅ 1973-ᒥ. ᑭᓯᐊᓂ, ᐊᐅᓱᐃᑦᑐᕐᒥᐅᑦ ᓂᕈᐊᖅᑎᑕᐅᓚᐅᖏᒻᒪᑕ, ᐃᓚᖏᑦ ᐃᓄᐃᑦ ᓱᓕ ᑕᒪᑐᒥᖓ ᐃᓕᓴᖅᓯᔪᒪᓐᖏᓚᑦ.

ᖃᓪᓗᓈᑎᑐᑦ ᐊᐅᓱᐃᑦᑑᑉ ᐊᑎᖓ ᓄᐊᕗᐃᔭᓐᑎᑑᕐᓯᒪᕗᖅ. ᐅᖃᐅᓯᖅ ‘ᒍᕇᔅ’ ᓄᐊᕗᐃᔭᓐᑎᑐᑦ ‘ᑯᒃᑰᓯᐅᕗᖅ.’ ᖃᐅᔨᒪᔭᐅᑦᑎᐊᕐᑐᖅ ᐊᑐ ᓱᕗᑦᕋᑉ ᐊᑎᖅᓯᓚᐅᕐᓯᒪᓐᓂᕐᐳᖅ ᓄᓇᐅᔪᒥᒃ ‘ᑯᒃᑰᓯᓄᑦ ᑲᖏᖅᖢᒃ’ ᑕᐃᔅᓱᒪᓂᐅᑎᓪᓗᒍ 1899-ᒥ ᐱᔾᔪᑎᒋᓪᓗᒍ ᐊᐃᕖᑦ ᓯᕿᓐᓂᕐᓯᐅᕐᑐᑦ ᐃᖅᑲᐃᔾᔪᑎᒋᓚᐅᕐᒪᒍ ᐊᓂᖅᓵᕐᑐᖅᑎᓪᓗᒋᑦ ᑯᒃᑰᓯᑦ.

ᓯᕗᑦᕋᑉ ᐃᖏᕐᕋᓂᖓ 1898-1901-ᒥ ᓄᓇᓐᖑᐊᓕᐅᕐᓯᒪᕗᖅ ᐊᐅᓱᐃᑦᑑᑉ ᕿᑭᖅᑕᖓᑕ ᐱᖓᓐᓇᖓᓂᒃ ᑲᓇᖕᓇᖓᓂᓪᓗ ᖃᐅᔨᔭᐅᓪᓗᓂᓗ ᐅᒥᖕᒪᑦ ᓄᓇᖓᑦ (Axel Heiberg Island), ᐅᒥᖕᒪᑦ ᓄᓇᖓᑕ ᐱᖓᓐᓇᖓᓂ (Amund Ringnes Island) ᐊᒻᒪ ᐅᒥᖕᒪᑦ ᓄᓇᖓᑕ ᐱᖓᓐᓇᖓᓃᒃᑲᓐᓂᕐᓂᕐᓴᐅᔪᖅ (Ellef Ringnes Island). ᐱᒋᐊᓐᖓᕐᓂᕆᔭᖓᑕ ᐸᕐᓇᐅᑎᓕᐊᕆᓯᒪᔭᖓᓂ ᓄᓇᓐᖑᐊᓕᐅᕋᓱᐊᕐᓯᒪᕗᖅ ᑲᓛᖦᖠᑦ ᓄᓈᑕ ᐅᐊᖕᓇᖓᓃᑦᑐᓂᒃ, ᑭᓯᐊᓂ ᓯᑯᖃᓗᐊᕐᓂᖓᓄᑦ ᐱᕐᓕᕋᕐᕕᔾᔪᐊᒥ (Kane Basin) ᐃᒻᒥᓄᑦ ᐊᔪᕈᑎᒋᓚᐅᕐᒪᒍ ᐱᓕᕆᐊᕆᓗᓂᐅᒃ. ᓱᕗᑦᕋᑉ ᐅᑭᐅᖅᓰᓚᐅᕐᐳᖅ ᐱᕐᓕᕋᕐᕕᒻᒥ (Pim Island) ᖃᐅᔨᓇᓱᐊᒃᑲᓐᓂᓕᕆᓪᓗᓂᐅᒃ ᐊᐅᓱᐃᑦᑑᑉ ᕿᑭᖅᑕᖓ. ᑲᖏᖅᖢᐊᕐᔪᒃ ᐊᑦᑎᓚᐅᕐᑕᖓ ᐅᒥᐊᕐᔪᐊᖓᑕ ᐊᑎᖓᓂᑦ, ‘ᕗᕌᒻ,’ ᑕᐃᑲᓂ ᑕᒻᒫᕆᐊᖃᓕᕐᓯᒪᑎᓪᓗᒋᑦ. ᕗᕌᒻ ᑲᖏᖅᖢᖕᒥ ᑭᖑᓪᓕᖓᒍᑦ ᐅᑭᐅᖅᓰᔭᕆᐊᖃᕐᓯᒪᕗᖅ. 1899 ᐅᑭᐊᒃᓵᖓᓂ, ᓱᕗᑦᕋᑉ ᐊᒥᓱᒐᓚᖕᓄᑦ ‘ᓇᐃᑦᑐᒧᑦ ᐊᓂᑲᑕᖃᑦᑕᓚᐅᕐᐳᖅ’ ᖃᐅᔨᓴᒃᑲᓐᓂᕋᓱᓪᓗᓂᐅᒃ ᐊᖏᓂᕐᓴᖅ ᓄᓇᐅᓂᖓ. ᐊᑕᐅᓯᕐᒥ ᐊᓂᕋᔭᖕᓂᖓᒍᑦ ᑲᒪᒋᔭᖃᓚᐅᕐᐳᖅ 100 ᑭᓛᒥᑕᑦ ᐅᖓᑎᐊᓄᑦ ᒫᓐᓇ ᑕᐃᔭᐅᓯᒪᓕᕐᑐᖅ ᕼᐊᐳ ᑲᖏᖅᖢᒥ. ᓇᖕᒥᓂᖅ ᐱᓕᕆᖃᑎᖏᓪᓗ ᐊᐅᓪᓚᖅᓯᒪᑲᐃᓐᓇᕐᑎᓪᓗᒋᑦ, ᐃᓚᖓᑦ ᐅᒥᐊᕐᔪᐊᕐᒥᐅᑕᖁᑎᖓᑦ ᐃᓅᔪᓐᓃᓚᐅᕐᒪᑦ ᖃᓂᒻᒪᓐᓇᒧᑦ. ᐃᓗᕕᖓᑕ ᓴᓐᓂᖓᔪᓐᖑᐊᖓ ᓇᐸᕗᖅ ᕼᐊᐳ ᑲᖏᖅᖢᒥ. ᐊᑐ ᓯᕗᑦᕋᑉ ᓄᓇᓐᖑᐊᓕᐊᕆᓯᒪᔭᖓ ᑕᒻᒪᖅᓯᒪᖏᑦᑎᐊᓚᐅᕐᓂᖓᓄᑦ ᐊᑐᖅᑕᐅᖃᑦᑕᓚᐅᕐᐳᑦ ᑎᑭᐅᑎᑐᐃᓐᓇᕐᓗᒍ 1956.

ᐃᓄᐃᑦ ᐊᓐᓇᒍᓐᓇᕐᓯᒪᕗᑦ ᑲᔪᓯᑦᑎᐊᕈᓐᓇᕐᓯᒪᓪᓗᑎᓪᓗ ᐅᑭᐅᖅᑕᕐᑐᒥ ᓇᒡᓕᓇᖅᑐᒻᒪᕆᐅᕙᒃᑐᒥ ᐊᕐᕌᒍᒐᓴᕐᔪᐊᖑᓕᕐᑐᓄᑦ ᐊᖑᓇᓱᒃᑎᓪᓗᒋᑦ ᓄᐊᑦᑎᑎᓪᓗᒋᓪᓘᓐᓃᑦ ᐆᒪᔪᓂᒃ, ᐃᒡᓗᕕᒐᓕᐅᕐᓂᒃᑯᑦ, ᕿᒧᒃᓯᕐᓂᒃᑯᑦ, ᖃᔭᖅᑐᕐᑎᓪᓗᒋᑦ, ᓂᕐᔪᑎᑦ ᐊᒥᖏᓐᓂᒃ ᐅᑭᐅᖅᓯᐅᑎᓕᐅᕐᑎᓪᓗᒋᑦ − ᐊᒻᒪ ᐃᓕᓐᓂᐊᕐᑎᑎᓪᓗᑎᒃ ᕿᑐᕐᖓᖏᓐᓄᑦ ᖃᐅᔨᒪᓂᕆᔭᖏᓐᓂᒃ. ᐃᓄᐃᑦ ᓯᕗᓕᕕᓂᖏᑕ ᓯᓚᑐᓂᖓᑦ ᑭᖑᕚᓅᖅᑕᐅᖃᑦᑕᕐᓯᒪᓂᖓ ᐅᓪᓗᒥᒧᑦ ᐱᒻᒪᕆᐊᓘᕗᖅ. ᓱᓕᕗᖅ ᐃᓄᐃᑦ ᓇᓗᓇᐃᔭᕐᓯᒪᑦᑎᐊᕐᑐᑎᒍᑦ ᐊᔾᔨᒌᖏᑦᑐᑦ ᐊᐳᒻᒥᒃ ᐊᑎᖃᕐᑎᑦᑎᕗᑦ. ᐊᔪᖏᓐᓂᕆᔭᐅᔪᑦ ᓲᕐᓗ ᕿᓚᐅᔾᔭᕐᓂᖅ, ᑲᑕᔾᔭᕐᓂᖅ, ᐅᑭᐅᖅᓯᐅᑎᓕᐅᕐᓂᖅ ᐊᓐᓄᕌᓂᒃ ᐃᒡᓗᕕᒐᓕᐅᓂᕐᓗ ᐃᓕᓐᓂᐊᕐᕕᒻᒥ ᐃᓕᓐᓂᐊᕐᑎᔾᔪᑕᐅᖃᑦᑕᕐᐳᑦ. ᐃᓕᓐᓂᐊᕐᕕᒃ ᒪᑐᐃᖅᑕᐅᓚᐅᕐᓯᒪᕗᖅ ᐊᐅᓱᐃᑦᑐᒥ 1962-ᒥ, ᐊᖑᓇᓱᒍᑎᑐᖃᐅᔪᑦ ᓄᐊᑕᐅᕙᒃᑐᑐᖃᐃᓪᓗ ᑮᓇᐅᔭᓕᐅᕈᑕᐅᖃᑦᑕᓕᕐᐳᑦ. ᖃᒧᑕᐅᔭᖃᓕᓚᐅᕐᓯᒪᕗᖅ 1967-ᒥ ᐊᒻᒪᓗ 1969-ᒥ ᕿᒧᒃᓯᖃᑦᑕᕈᓐᓃᕐᓯᒪᕗᑦ. ᐃᓚᖏᑦ ᐃᓄᐃᑦ ᐃᓕᖅᑯᓯᑐᖃᖏᑦ ᓱᓕ ᐊᑐᖅᑕᐅᑦᑎᐊᕋᓗᐊᕐᐳᑦ ᐅᓪᓗᒥ ᑕᐃᒪᐃᒃᑲᓗᐊᕐᑎᓪᓗᒍ, ᐊᑐᖅᑕᐅᕙᒃᐳᑦ ᓱᓕ ᓲᕐᓗ ᐊᖑᓇᓲᑎᑐᖃᕆᔭᐅᔪᑦ, ᐅᓈᑦ, ᓴᒃᑯᐃᑦ, ᖃᒧᑎ, ᐅᓗᒃ, ᑲᒦᑦ ᐊᒻᒪ ᐅᖅᑰᔪᖅᓯᐅᑎᓕᐊᕆᓯᒪᔪᑦ.

ᐃᓄᐃᑦ ᓂᕆᔾᔪᓯᑐᖃᖓᑦ ᐃᓚᓕᐅᑎᓯᒪᓕᕆᕗᖅ ᓂᐅᕕᐊᖑᕙᒃᑐᑦ ᓂᕿᓂᒃ ᑭᓯᐊᓂ ᐊᖑᓇᓱᐃᓐᓇᖃᑦᑕᕐᐳᑦ ᓱᓕ ᐊᕐᕌᒍᓕᒫᒥ. ᐅᐱᕐᖓᒃᓵᒃᑯᑦ ᐊᐅᔭᒃᑯᓪᓗ ᑐᒃᑐᕋᓛᑦ, ᕿᓚᓗᒐᐃᑦ ᐊᐃᕖᓪᓗ ᐊᖑᔭᐅᖃᑦᑕᕐᐳᑦ, ᐃᖃᓗᒐᓱᖃᑦᑕᕐᑎᓪᓗᒋᑦ ᑕᓪᓗᕈᑎᐅᑉ ᐊᒻᒪ ᐊᐅᓱᐃᑦᑑᑉ ᕿᑭᖅᑕᖓᓂ ᓂᒋᐊᑕ ᐊᑯᓐᓂᖓᓃᑦᑐᖅ Jones Sound-ᒥ. ᓇᑦᑎᕋᓱᐃᓐᓇᖃᑦᑕᕐᐳᑦ, ᐃᓄᐃᑦ ᐃᓚᒌᓄᑦ ᓂᕿᓪᓗᐊᑕᕆᔭᐅᕗᖅ. ᐃᓛᓐᓂᒃᑯᑦ ᐅᑭᐅᖅᑕᖅᑐᒥ ᖁᑦᑎᓐᓂᕐᐹᖑᓂᕋᖅᑕᐅᕙᒃᑐᖅ, ‘ᓇᓄᖅ,’ ᐊᕐᕌᒎᑉ ᐃᓚᖓᓂ ᓇᓐᓄᒍᓐᓇᖃᑦᑕᕐᐳᑦ ᐱᔭᐅᔪᓐᓇᕐᓂᖏᑕ ᑭᒡᓕᖃᖅᑎᑕᐅᓂᖓᒍᑦ. ᐊᒻᒪᓗ ᐅᒥᖕᒪᒐᓱᖃᑦᑕᕆᕗᖅ, ᐊᐅᓱᐃᑦᑐᑐᖃᐅᓚᐅᕐᓯᒪᔪᒥ ‘ᐊᖏᔪᖅ ᓂᕐᔪᑎᓂᑦ’ ᓂᕐᔪᑎᑐᖃᐅᓯᒪᔪᖅ ᑭᖑᓪᓕᖅᐹᖅ ᓄᓇᕐᔪᐊᖅ ᓯᑯᐃᓐᓇᐅᑎᓪᓗᒍ.

1953-ᒥᑦ 1970-ᒧᑦ, ᐳᓚᕋᖅᑐᓕᕆᓂᖅᑕᖃᓚᐅᕐᓯᒪᓐᖏᓚᖅ ᑕᒫᓂ. ᐅᓪᓗᒥᐅᓕᖅᑐᕐᓕ ᐳᓚᕋᖅᑏᑦ ᖁᕕᐊᒋᔭᖃᖃᑦᑕᓕᕐᐳᑦ 24-ᐃᑲᕐᕋᓕᒫᒧᑦ ᖃᐅᒪᐃᓐᓇᖃᑦᑕᓕᕐᑎᓪᓗᒍ ᐊᒻᒪᓗ ᐅᓐᓄᐊᒃᑯᓪᓗ ᓯᕿᓐᓂᖃᑦᑕᕐᑎᓪᓗᒍ. ᑭᓇᑐᐃᓐᓇᐅᒍᓗᐊᕈᕕᑦ, ᐳᓛᕆᐊᖅᓯᒪᔪᑦ ᑕᕝᕗᖓ ᑐᓐᖓᓱᒃᑎᑕᐅᑦᑎᐊᖃᑦᑕᕐᐳᑦ. ᐳᓛᕆᐊᖅᓯᒪᔪᑦ ᖃᐅᔨᑲᐅᑎᒋᕙᒃᐳᑦ ᐃᓚᓐᓇᕇᑦᑎᐊᕐᓂᖏᓐᓂᒃ ᓄᓇᓕᒋᔭᑦᑎᓐᓂ. ᑐᓐᖓᓇᖅᑐᒻᒪᕆᐊᓘᕗᓪᓗ! ᐊᐅᓱᐃᑦᑐᒥ, ᐃᓕᖕᓂᒃ ᑐᓐᖔᑦᑎᐊᓂᐊᕐᐳᒍᑦ ᖃᐃᖁᔨᒐᓗᐊᕐᐳᒍᑦ ᖁᕕᐊᓱᖃᑎᒌᓪᓗᑕᓗ ᐊᕐᕌᒍᑕᒫᑦ ᓄᓇᕗᒧᑦ ᐅᓪᓗᖁᑎᒋᔭᑦᑎᓐᓂᒃ, ᔪᓚᐃ 9-ᒥ ᓇᓪᓕᐅᓐᓂᕐᓯᐅᕈᑎᖃᖅᑎᓪᓗᒋᑦ!

Visitez Grise Fiord:
bienvenue au sommet
du globe